ភ្នំពេញ៖ ក្រោយការដាក់ចេញនូវយុទ្ធនាការជំរុញនិងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការ ដែលបានប្រកាសដាក់ចេញដោយលោកឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌៌ សាធារណជនជាច្រើនបានបង្ហាញនូវការសាទរ និងថ្លែងអំណរគុណមកកាន់តុលាការដែលបានដោះស្រាយនូវរឿងក្ដីនានាប្រកបដោយភាពត្រឹមត្រូវ ឆាប់រហ័ស និងប្រកបដោយយុត្តិធម៌៌ ជាពិសេសគឺចំណាត់ការលើរឿងក្ដីអាទិភាពទាំង ៣ប្រភេទគឺ សំណុំរឿងគ្រឿងញៀន, សំណុំរឿងគ្រោះថ្នាក់ចរាចរណ៍ និងការកែតម្រូវទិន្នន័យអត្រានុកូលដ្ឋាន។ 

ជាក់ស្ដែង កន្លងមកលោកឧបនាយករដ្ឋមន្រ្តី កើត រិទ្ធ ក៏បានដាស់តឿនឱ្យចៅក្រម ព្រះរាជអាជ្ញា ព្រមទាំងមន្រ្តីពាក់ព័​ន្ធនៅតាមសាលាជម្រះក្ដីទាំងអស់ ត្រូវធ្វើយ៉ាងណាឱ្យសម្រេចបាននូវចំណាត់ការឱ្យបានល្អប្រសើរចំពោះរឿងក្ដីជាអាទិភាពខាងលើ រហូតដល់រដ្ឋមន្ត្រីក្រសួងយុត្តិធម៌បានស្នើឱ្យពិចារណាទៅលើការចាត់តាំងចៅក្រម ព្រះរាជអាជ្ញាទទួលបន្ទុកលើសំណុំរឿងជាអាទិភាពខាងលើផងដែរ។ 

ដោយឡែក នៅព្រឹកថ្ងៃសៅរ៍នេះ ក្រសួងយុត្តិធម៌បានបង្ហាញនូវបញ្ជីឈ្មោះលោក-លោកស្រីចៅក្រម ព្រះរាជអាជ្ញា ទទួលបន្ទុកចាត់ការលើសំណុំរឿងចរាចរណ៍ ព្រមទាំងលោក-លោកស្រីចៅក្រមទទួលបន្ទុកចំណាត់ការលើសំណុំរឿងកែតម្រូវទិន្នន័យអត្រានុកូលដ្ឋានផងដែរ ដើម្បីបង្កើនប្រសិទ្ធិភាព និងភាពឆាប់រហ័សជាងមុនទៅលើសំណុំរឿងអាទិភាពខាងលើ៕